Кунчиқар мамлакатда Ўзбекистон мустақиллигининг ўттиз икки йиллигига бағишланган байрам тадбири ўтказилди

Жорий йил 20 сентябрь куни Ўзбекистоннинг Япониядаги элчихонаси томонидан мамлакатимиз Мустақиллигининг 32 йиллигига бағишланган расмий қабул маросими ўтказилди.

Унда Япониянинг вазирлик ва идоралари, Токиода аккредитациядан ўтган дипломатик корпус ҳамда халқаро ташкилотлар, ишбилармон ва илмий доиралар вакиллари, ўзбек миллий маданий марказлари фаоллари, шунингдек, кунчиқар мамлакатда таҳсил олаётган ва ишлаётган ватандошлар иштирок этишди.

Тадбирни Ўзбекистон элчиси Мухсинхўжа Абдурахмонов қутлов нутқи билан очиб берди. Элчи юртимизда амалга оширилган кенг кўламли ислоҳотлар, юртимиз ижтимоий ҳаётнинг барча жабҳаларида эришилаётган ютуқлар ва янгиланишлар ва Япония билан чуқурлашиб бораётган бугунги ўзаро яқин муносабатлар ҳақида алоҳида тўхталди.

Хусусан, Япония Ташқи ишлар вазирининг парламент ишлари бўйича ўринбосари Фуказава Ёучи жаноблари ўз чиқишида ҳукумат номидан Ўзбекистон халқини миллий байрам билан табриклаб, икки давлат ўртасидаги муносабатлар стратегик шериклик даражасида турли соҳаларда жадал ривожаниб бораётгани, бундан икки давлат тенг манфаатдор эканлигини таъкидлаб ўтди.

Тадбир давомида ўзбекистонлик таниқли санъаткор ва созандалар ижросида куй-қўшиқлар ўзбек мусиқа санъатининг жозибаси нақадар буюк эканлигини яна бир бор тасдиқлаб, тадбир иштирокчиларининг олқишига сазовор бўлди. Қатнашчилар ўзбек миллий таомларини таътиб кўриш имконидан мамнун бўлишди.

Шунингдек, маросим доирасида ташкил этилган ўзбек миллий ҳунармандчилик ва рассомчиликлик асарларидан иборат кўргазма қабул меҳмонларида катта таассурот қолдирди.

Фуказава Ёуичи, Япония ташқи ишлар вазирининг парламентар ўринбосарининг табриги

Интерьвю Ўзбекистон Республикаси Мустақиллигининг 32 йиллигига бағишланган қабул маросимида ёзиб олинган

“Сизларни Ўзбекистон Мустақиллигининг 32 йиллиги билан чин қалбимдан табриклайман. Қабул чоғида Ўзбекистоннинг Япониядаги элчиси жаноб М.Абдураҳмонов сўзга чиқиб, сўнгги йиллларда Президент Шавкат Мирзиёев раҳнамолигида юртингизда амалга оширилган кенг кўламли ислоҳотлар ижтимоий ҳаётнинг барча жабҳаларида янгиланиш ва туб ўзгаришларга асос бўлаётганини, бунинг натижасида дунё ҳамжамиятида «Янги Ўзбекистон» номи тобора кўпроқ тилга олинаётганини таъкидлади.

Япония ҳам Янги Ўзбекистоннинг янада равнақ топишига чинакам умид боғлайди. Япония ҳукумати Ўзбекистонда амалга оширилаётган ислоҳотларни қўллаб-қувватлашда давом этади ва қонун устуворлигига асосланган очиқ ва эркин халқаро тартибни яратиш йўлида мамлакатингиз билан жадал ҳамкорлик олиб боради.

Ҳар йили Япония парламенти аъзолари Ўзбекистон Мустақиллиги куни муносабати билан ўтказиладиган Қабул маросимида иштирок этиб келмоқда. Сизни ишонтириб айтаманки, улар ҳар йили ўтказиладиган ушбу тадбирда иштирок этишда давом этадилар.

Ўзбекистон халқини яна бир бор мамлакат мустақиллигининг 32 йиллиги билан самимий табриклайман”.